قصة قصيرة بعنوان ( الجاي احسن )  مستوحاة من المجتمع فيها العبرة والتفاؤل والأمل

بقلم طارق مؤنس العطار 

 مستوحاة من المجتمع فيها العبرة والتفاؤل والأمل ..

المقدمة 

اهداء الى كل الأرواح التي شاهدت صور ووجوه متغيره وتقلبات  ومظاهر مختلفة  وخلافات ونزاعات وقهر وبكاء وعوز وفقد  وحرمان  وفرح وسعادة واعراس ورقص ونجاح ودموع ( وتالي نصفن هي هاي الدنيا  ) .

مطلع القصة 

يحكى كان هنالك أناس يعيشون في بلد متغيرة عاداتهم واشكالهم وطريقة ارتداء ملابسهم ولكنتهم  متغيرة حسب المنطقة والمدينة ولكن لغتهم واحدة واكلاتهم متشابهة نكهاتهم لذيذة متزاوجون فيما بينهم الحب لديهم مقدس لكن يتصفون بصفة الحب التملك ِ . شديدون الطباع يحبون ويكرهون يحقدون  يتعصبون وينسون ويعودون مع بعضهم .. الطعام يجمعهم والعلاقات تجبرهم على العودة واللقاء  ،  مصالهم مشتركة  يحتاجون بعضهم بعضا .. طبعهم ازدواجي بين الكرم والجود وبين الانتقاد والضجر .. يضحكون بصوت عالي من كل قلبهم ويبكون بصوت عالي من أعماق حزنهم عاطفتهم هي نقطة ضعفهم .. ينتقدون بعضهم بطريقة ساخرة لكن أصلها محبة في اعماقهم ازدواجيتهم احتار العالم بوصفها .. بلد مجموعة من الاعراق فروعها كثيفه ومتشابكة ومتشاركة بجذع واحد اشبه بجذع النخلة 🌴 تحمل رطب وخيرات متنوعة أشكالها لذيذة الطعم ، أ ثمارها نضجت بعد فترة قاسية من الحر الشديد لا يتحمله اي كائن بشري فقط اهل البلد الذين  اعتادوا  على طقسه  . جذعها شديد جدا لا يقطع بسهولة اصول جذعها فيها ثمار أطيب طعما من رطبها.. جذورها متينة الوتد لا تقلع بسهولة . اصول هذا البلد من تربته ومائه ،  زرعها فتان مساحاتها خضراء  خلابة المنظر كأنها لوحة فنان ،  عطرها جميل شمسها لاهبة جوها حار 🔥  برودتها جافه قارصه في بعض الأحيان  امطارها غزيرة تارة ً جافة ً تارة .. ربيعها متباين بين منطقة واخرى ربيع قصير جنة وربيع طويل نوروزي. جبال ووديان وهضاب وانهر وسهول وصحاري واهوار وبحيرات .. مختلفة الطبيعة .

خريفها مودعا  حرها ومستقبلا شتائها.. يتصف بشديد العطاس والحساسية  لكن شكل وعطر ومنظر جميل . تمر عليها  اجواء عواصف ترابية موسمية فتغسلها امطارها سماء صافيه وغيوم وليل ونجوم وقمر لوحة فنية يعجز الواصف وصفها .

النهاية 

هجمات كثيرة توالت عبر الزمن على هذا البلد تغير ما تغير ومن بقى بقى ومن رحل رحل وسافر بعيدا ،  ومن مات مات ومن صبر صبر ومن تغيرت احواله من كان في عوز وبالتالي اغتنى ولم يكتفي . والغني حافظ على ما يملكه 

ومن كان في بحبوحة من يومه ثم صحى ولم يجد شئ مما  يكنزه .

الخلاصة إيجابية 

بالعراقي .. ناكل ونشرب ونام ونكعد ونضحك ونبجي ونسافر ونتغرب  ونرجع  ونلتقي ونروح ونجي ونطلع ونتونس ونتزاوج ونطلك  ونصادق ونتصاحب وننفصل ونحب ونكره وننتقد ونتعارك ونتزاعل ونتصالح وتالي على اسباب بسيطة سخيفة نبتعد وتالي على اسباب بسيطة طريفة صدفة نلتقي ونرجع كأنه مصار شي  .. ماتسوى نظل واحد يريد ياكل من لحم الثاني وتنخلق عداوات وثارات ترا بالاخير ميتين ونموت وبعد ما نكدر نرجع ونصلح ونوفي الي جان يطلبك  مو بس فلوس يطلبك حك تالي  نصير جوه التراب شتفيد اذا واحد ظلم  واحد شتفيد فلوسك وجاهك شتفيد عصبيتك وحقدك وانتقامك شيفيد تسلطك ولؤمك وبخلك .  يا عيني شكد واحد يكدر  اسوي خير  سوي اتصالح احترم نفسي واحترم غيري واتقبله بكل ما يملك وما اسوي ميانه حتى لا اتندم  ، واعيش يومي ،  اول تالي واحد يحتاج الثاني . إذا جنت محبوب  فطير  او  مكروه غثيث ، لا تلزك وتصير عاله ، ولا تشيل خشمك تثكل علينا  ، ترا احنه صينيتنا وحده وين ما تروح الدولمة  ، والبرياني ، والمركة  ، والسمج المسكوف ، والمشاوي  ، واللبن والتمر  ، والكيمر والكاهي وجبن عرب وزيتون وخضروات وخبز التنور الحار وصمونه حارة ،  والباكلة بالدهن ،  والبيتنجان والطماطة المقلية  اللاجعة بالطاوة .. والجاي والكهوة والسوالف تلمنه ، وشهر رمضان ننجمع سويه نفطر والسفرة العامرة بأشهى المأكولات ونتزاور وبعيد الفطر نتعايد وبعدها بعيد الاضحى . والله اكو غير شي  بس كلولي . وين اكو احله من هيج لمه .

كافي حقد ولؤم وخبث وعداوه ونميمه وحسد ونقص بالذات واحد عين على الاخر وتريد كلشي الك ماتشبع عينك ، جارك و اخوك يون وانت كاعد متونس على جرحه . كافي نقهر بنفسنا ونقهر غيرنا .

أصل العراقي عطوف واحد يحن على الآخر ..اخر فترة صارت احقاد بسبب المال والاستحواذ على السلطة صارت ناس فوك وناس جوه وناس غيرت من طبعها ومبادئها حتى تخلص من الفكر والعوز وناس بقت على مبادئها بس كتلها القهر والحرمان.

وناس ظلت محافظة على املاكها بس متكتمه وعايشه وساكته .

الله فوك ويشوف ويكتب تره محد مات اخذ شي وياه ..

خلونا نعيش سويه ونتزاوج ونحب بعضنا ونفرح ونركص ونغني وتجي ايام الحزن نلطم بمحرم ونطبخ ( هاي عاداتنا وتقاليدنا ) ومولود النبي عليه الصلاة والسلام ننجمع من كل المناطق وبعيد نوروز نركص سويه متكاودين كراد وعرب وتجي نهاية السنة نعيد ويا المسيحيين ✝️.
هذا اصلنا ولا ننسى مرجعنا إلى الله .
ربي يحفظكم ويرعاكم ويجعلكم بأفضل حال .
الجاي احسن .